O V Congreso Internacional da Auga celebrouse en setembro de 2024 no campus de Ourense baixo lema, A auga como recurso sostible: ciencia, empresa e benestar, e agora veñen de publicarse as actas.  O libro, editado polo Servizo de Publicacións da Universidade de Vigo, ten como coordinadores a Francisco Javier Rodríguez Rajo, vicerreitor do campus de Ourense, e Mª Montserrat Cruz, presidenta do comité organizador do citado congreso. Nel recóllense 15 artigos asinados por un abano de especialistas arredor de catro eixos temáticos: a actividade turística e auga; termalismo; economía circular e empresa, economía e auga. Ao longo das súas páxinas abórdanse múltiples aspectos relacionados coa temática da auga, tales como o patrimonio hídrico e a súa xestión en empresas e turismo. Ademais, explóranse aspectos relacionados coa economía circular, a responsabilidade social e os obxectivos de desenvolvemento sostible no contexto dos recursos hídricos. 

Entre os traballos recollidos na publicación están as últimas investigacións arqueolóxicas no balneario de Carlos III (Guadalajara, España); o programa de termalismo social do Imserso; a revitalización de balnearios en desuso na España baleirada; o efecto do cociñado con auga termal sobre o contido en minerais e metais pesados; a planificación turística no Amazonas ou a xestión sostible dos recursos hídricos na agricultura de regadío no espazo Sudoeste europeo (SUDOE). Entre os artigos asinados por persoal investigador da Universidade de Vigo hai traballos sobre as augas mineromedicinais do Camiño Miñoto Ribeiro; a situación actual dos peloides elaborados con augas de Galicia; os informes de sostibilidade medio ambiental e a interrelación entre turismo e acuicultura en España. 

Pode mercarse o libro de actas (5€) facendo clic neste botón