A Universidade de Vigo abriu o 28 de maio de 2026 o prazo de solicitude das axudas propias para a mobilidade do persoal investigador do Campus Auga (código MOBAUGA_26), que estará aberto ata o 25 de xuño de 2026.

Estas axudas teñen como obxectivo financiar parcialmente estadías en centros de investigación para contribuír ao intercambio de coñecemento e á internacionalización da actividade investigadora en liñas estratéxicas do Campus Auga.

Poderán solicitalas persoal investigador predoutoral e posdoutoral con contrato vixente ata o 31 de decembro de 2026 no marco do convenio Campus Auga, persoal investigador predoutoral ou posdoutoral pertencente a grupos do Campus Auga que non recibise financiamento para mobilidade durante 2026, así como estudantes de doutoramento matriculados nun programa vinculado ao Campus Auga.

Entre outros requisitos, é necesario ter esgotado o crédito concedido para estadías de investigación por convocatorias autonómicas ou estatais, e non ter sido obrigado a reintegrar axudas propias da Universidade de Vigo nas tres últimas convocatorias.

Toda a información, documentación e formularios na web da Secretaría da UVigo.