O VI Congreso Internacional do Campus Auga celebrarase os días 8 e 9 de outubro no campus de Ourense, cunha edición centrada na innovación aeroespacial aplicada á xestión ambiental e agraria. Baixo o lema “Sistemas aeroespaciais para respostas multisectoriais ante desafíos ambientais”, o evento está organizado pola Escola de Enxeñaría Aeronáutica e do Espazo e a Vicerreitoría do Campus de Ourense, co patrocinio da Deputación de Ourense. O comité organizador, presidido por Francisco Javier Rodríguez e Nieves Lorenzo, sinala que o congreso busca amosar como satélites, drons e tecnoloxías de teledetección están a revolucionar a observación e xestión do territorio.

A programación articularase en catro bloques temáticos: agricultura de precisión e produción sostible; xestión da auga e recursos naturais; incendios forestais e seguridade ambiental; e cambio climático, urbanismo e planificación territorial na xestión das augas termais. O congreso combinará relatorios, mesas redondas con especialistas multisectoriais, demostracións tecnolóxicas e presentacións de casos de éxito reais. O obxectivo é crear un espazo de encontro para o intercambio de coñecemento e a xeración de sinerxías entre persoal investigador, profesionais, empresas, entidades do sector primario e administracións públicas.

Programa, inscrición e toda a información na web do congreso.