A xornada de clausura “Proxectos emprendedores no Campus Auga” celebrouse o 29 de xaneiro de 2026 na Aula Magna da Escola Superior de Enxeñaría Informática do campus de Ourense. Durante a tarde, presentáronse os traballos Tanaris e Sempre na casa. O proxecto gañador foi Sempre na casa, de Paula Pato, Natalia Outomuro, Sara Somozo, Gabriel Maciás e Pablo Tavarés, mentres que Tanaris completou a oferta emprendedora da xornada.

O evento contou coas intervencións de Jose María Torre (El Club del Emprendimiento), David Martínez (AEPA Ourense) e Pablo Sanmartín (Digital Gou), que ofreceron cadansúa conferencia ao alumnado. Destacou especialmente a presenza de David Martínez, recentemente elixido presidente da CEO (Confederación de Empresarios de Ourense), cuxa visión foi fundamental para impulsar o emprendemento na comunidade. A continuación, celebrouse unha mesa moderada por Javier Rodeiro, na que se debateron aprendizaxes, retos e experiencias do emprendemento universitario.

Ao longo da xornada púxose de relevancia que saber comunicar con eficacia, exercer un liderado activo e adoptar unha actitude emprendedora resultaron tan relevantes como os coñecementos técnicos. A comunicación demostrou ser unha ferramenta clave para expresar ideas, favorecer o traballo en equipo e xerar impacto; o liderado entendido como iniciativa e compromiso; e o emprendemento como motor da creatividade e a autonomía. A xornada concluíu coa entrega de premios, recoñecendo o esforzo e a creatividade do alumnado participante, e consolidouse como un éxito tanto en participación como en aprendizaxe.